საქართველოში ბიზნესკლიმატი კვლავ ბუმის ფაზაშია - სექტორებს შორის მშენებლობა ლიდერობს

BAG-ის ბიზნეს კლიმატის ინდექსი 2026 წლის მესამე კვარტალში 48.4 ქულამდე გაიზარდა. ყველაზე პოზიტიური შეფასებები მშენებლობის სექტორში დაფიქსირდა, მრეწველობაში კი მომდევნო ექვსი თვის მოლოდინი, მიმდინარე მდგომარეობის შეფასებას მნიშვნელოვნად აღემატება.

საქართველოს ბიზნეს ასოციაციის (BAG), PMC კვლევითი ცენტრისა და გერმანიის ეკონომიკური კვლევების ინსტიტუტის (ifo Institute) ერთობლივი კვლევის მიხედვით, 2026 წლის მესამე კვარტალში, საქართველოში ბიზნეს კლიმატი დადებითად შეფასდა და წინა კვარტალთან შედარებით მცირედით გაუმჯობესდა. ამასთან, კვლევის შედეგები აჩვენებს, რომ ბიზნესის ოპტიმიზმის ზრდა, ძირითადად, მომდევნო ექვსი თვის მოლოდინების გაუმჯობესებით არის განპირობებული, მაშინ, როდესაც კომპანიების მიმდინარე მდგომარეობის შეფასება თითქმის უცვლელია.

BAG ბიზნეს კლიმატის ინდექსმა, 2026 წლის მესამე კვარტალში, 48.4 ქულა შეადგინა, რაც მეორე კვარტლის მაჩვენებელზე 0.8 ქულით, ხოლო 2025 წლის შესაბამის პერიოდთან შედარებით 5.2 ქულით მეტია.

ინდექსის ორი ძირითადი კომპონენტიდან ბიზნესის მიმდინარე მდგომარეობის შეფასება 29.7 ქულას შეადგენდა, მომდევნო ექვსი თვის მოლოდინის მაჩვენებელი კი 68.6 ქულას გაუტოლდა.

კვარტალურ ჭრილში ბიზნესის მოლოდინის მაჩვენებელი 2.2 ქულით გაუმჯობესდა. თუმცა, მიმდინარე მდგომარეობის შეფასება 0.3 ქულით შემცირდა. ეს განსხვავება კიდევ უფრო თვალსაჩინოა წლიურ ჭრილში. 2025 წლის მესამე კვარტალთან შედარებით, ბიზნესის მოლოდინი 12.1 ქულით გაიზარდა, მიმდინარე მდგომარეობის მაჩვენებელი კი 0.9 ქულით გაუარესდა.

ეს მონაცემები მიუთითებს, რომ ბიზნეს სექტორი მომავალი პერიოდის მიმართ უფრო ოპტიმისტურად არის განწყობილი, ვიდრე საკუთარი მიმდინარე საქმიანობის მიმართ.

ბიზნეს კლიმატი კვლავ ბუმის ფაზაშია

BAG-ის კვლევის თანახმად, 2026 წლის მესამე კვარტალში, ბიზნეს კლიმატის მაჩვენებელი, კვლავ ბუმის ფაზაში იმყოფება. აღნიშნული შეფასება ეფუძნება მიმდინარე მდგომარეობისა და მომდევნო ექვსი თვის მოლოდინების ერთობლივ პოზიტიურ შეფასებას.

მეთოდოლოგიურად, ბიზნეს კლიმატის ინდექსი წარმოადგენს მიმდინარე მდგომარეობისა და მომდევნო ექვსი თვის მოლოდინების საბალანსო მნიშვნელობების ტრანსფორმირებულ საშუალოს. მისი მნიშვნელობა შეიძლება იყოს -100-დან +100-მდე. შესაბამისად, 48.4 ქულა არ წარმოადგენს ეკონომიკური ზრდის პროცენტულ მაჩვენებელს. კიდევ უფრო მეტი სიცხადისთვის, ის, ასახავს გამოკითხული კომპანიების შეფასებების საერთო მიმართულებას.

ამასთან, მნიშვნელოვანია იმის გათვალისწინებაც, რომ ინდექსის გაუმჯობესება არ ნიშნავს მიმდინარე ბიზნეს საქმიანობის თანაბარი ტემპით გაძლიერებას. მესამე კვარტლის მონაცემებში, ერთ-ერთ მთავარ მიგნებას, სწორედ მოლოდინებსა და არსებულ მდგომარეობას შორის განსხვავება წარმოადგენს.

მშენებლობა ბიზნეს კლიმატის მხრივ ლიდერობს

სექტორული მონაცემებით, 2026 წლის მესამე კვარტალში, ბიზნეს კლიმატის მაჩვენებელი ოთხივე მიმართულებაში დადებითი იყო, თუმცა, სექტორებს შორის მნიშვნელოვანი განსხვავებები გამოიკვეთა.

კერძოდ, ყველაზე მაღალი მაჩვენებელი - 65.1 ქულა, მშენებლობის სექტორში დაფიქსირდა. მას, 51.2 ქულით, მოსდევს მომსახურება, 41.7 ქულით - მრეწველობა და 40.1 ქულით - ვაჭრობა.

მშენებლობის სექტორი ლიდერობს, როგორც მიმდინარე მდგომარეობის, ისე მომდევნო ექვსი თვის მოლოდინების მიხედვით. აქ, მიმდინარე მდგომარეობის შეფასებამ 53.8 ქულა, ხოლო მოლოდინის მაჩვენებელმა 76.9 ქულა შეადგინა.

განსაკუთრებით საყურადღებოა მშენებლობის სექტორში კვარტალური გაუმჯობესების მასშტაბი. მეორე კვარტალთან შედარებით, მიმდინარე მდგომარეობის შეფასება 20.5 ქულით, ხოლო მომდევნო ექვსი თვის მოლოდინი - 40.6 ქულით გაიზარდა.

მშენებლობა ყველაზე მნიშვნელოვანი პოზიტიური ცვლილებით გამოირჩევა წლიურ ჭრილშიც. კერძოდ, 2026 წლის მესამე კვარტლის ბიზნესკლიმატის მაჩვენებელი, წინა წლის შესაბამის პერიოდთან შედარებით, 35.4 ქულით გაუმჯობესდა.

ეს შედეგები, მშენებლობას, BAG-ის კვლევაში ყველაზე პოზიტიურად შეფასებულ სექტორად წარმოაჩენს.

მრეწველობაში ოპტიმიზმი მიმდინარე მდგომარეობას მნიშვნელოვნად უსწრებს

სექტორულ ჭრილში ერთ-ერთი ყველაზე საინტერესო სურათი მრეწველობაში იკვეთება.

მიუხედავად იმისა, რომ ბიზნეს კლიმატის საერთო მაჩვენებელი 41.7 ქულას შეადგენს, მიმდინარე მდგომარეობის შეფასება მხოლოდ 12.5 ქულით განისაზღვრა. ამავდროულად, მომდევნო ექვსი თვის მოლოდინის მაჩვენებელი 75 ქულას აღწევს. შესაბამისად, მეორე კვარტალთან შედარებით, მრეწველობის მიმდინარე მდგომარეობის შეფასება 9.7 ქულით გაუარესდა, ხოლო მომავლის მოლოდინი 2.8 ქულით გაუმჯობესდა.

აღსანიშნავია, რომ სექტორთა შორის მრეწველობას, მშენებლობის შემდეგ, მეორე ყველაზე მაღალი მოლოდინის მაჩვენებელი აქვს. ამდენად, კომპანიების შეფასებებში ვლინდება მნიშვნელოვანი განსხვავება არსებულ საქმიანობასა და მომავალი პერიოდის პერსპექტივებს შორის.

რაც შეეხება დინამიკას წლიურ ჭრილში, მრეწველობაში ბიზნესკლიმატი 19.5 ქულით გაუმჯობესდა, რაც ამ სექტორში განწყობების არსებით ცვლილებაზე მიუთითებს. თუმცა, მიმდინარე მდგომარეობის შეფასების გაუარესება აჩვენებს, რომ პოზიტიური მოლოდინები ჯერ კიდევ არ ასახავს მიმდინარე საქმიანობის შესატყვის გაუმჯობესებას.

მომსახურებაში დადებითი კლიმატი შენარჩუნებულია, თუმცა, მოლოდინები გაუარესდა

მომსახურების სექტორში ბიზნეს კლიმატის მაჩვენებელი 51.2 ქულას შეადგენდა. მიმდინარე მდგომარეობა 34.2 ქულით, ხოლო მომდევნო ექვსი თვის მოლოდინი 69.4 ქულით შეფასდა.

მეორე კვარტალთან შედარებით, მიმდინარე მდგომარეობის შეფასება 4.3 ქულით შემცირდა, ხოლო მომავლის მოლოდინი 7.5 ქულით გაუარესდა.

მიუხედავად აღნიშნული კლებისა, მომსახურება ბიზნეს კლიმატის საერთო მაჩვენებლით მეორე ადგილზეა და მიმდინარე მდგომარეობის შეფასებითაც მეორე პოზიციას იკავებს.

რაც შეეხება დინამიკას წლიურ ჭრილში, სექტორის ბიზნეს კლიმატის მაჩვენებელი პრაქტიკულად უცვლელია - 2025 წლის მესამე კვარტალთან შედარებით მხოლოდ 0.1 ქულით შემცირდა.

ამრიგად, ეს მაჩვენებლები მიუთითებს, რომ მომსახურების სექტორში დადებითი ბიზნეს განწყობა შენარჩუნებულია, მიუხედავად იმისა, რომ ბოლო კვარტალში, როგორც მიმდინარე საქმიანობის, ისე მოკლევადიანი პერსპექტივების შეფასება შესუსტდა.

ვაჭრობაში შედარებით ფრთხილი მოლოდინებია

ვაჭრობის სექტორში ბიზნეს კლიმატის მაჩვენებელმა 40.1 ქულა შეადგინა, რაც ოთხ სექტორს შორის ყველაზე დაბალი შედეგია.

მიმდინარე მდგომარეობა 21.2 ქულით შეფასდა, მომდევნო ექვსი თვის მოლოდინი კი 60.6 ქულას გაუტოლდა. შესაბამისად, ვაჭრობის სექტორში მომავლის მიმართ დადებითი განწყობა შენარჩუნებულია, თუმცა, სხვა სექტორებთან შედარებით ნაკლებად ძლიერად გამოხატული ფორმით.

კვარტალურ ჭრილში მიმდინარე მდგომარეობის შეფასება 0.7 ქულით, ხოლო მოლოდინი 0.1 ქულით გაუმჯობესდა. ამასთან, წლიურ ჭრილში სექტორის ბიზნესკლიმატი 6.7 ქულით გაუარესდა.

აღნიშნული მონაცემები ვაჭრობის სექტორში შედარებით ფრთხილ ბიზნეს განწყობებზე მიუთითებს და მას, სხვა, განსაკუთრებით მშენებლობისა და მრეწველობის სექტორებისგან განასხვავებს.

რას აჩვენებს მესამე კვარტლის მონაცემები?

BAG-ის 2026 წლის მესამე კვარტლის ბიზნეს კლიმატის კვლევიდან რამდენიმე მნიშვნელოვანი ტენდენცია იკვეთება.

პირველი - საქართველოს ბიზნეს სექტორში საერთო განწყობა დადებითია და ბიზნეს კლიმატის ინდექსი წლიურ ჭრილში გაუმჯობესდა. თუმცა, ეს ცვლილება, ძირითადად, მომდევნო ექვსი თვის მიმართ ოპტიმიზმის ზრდით არის განპირობებული და არა მიმდინარე მდგომარეობის მნიშვნელოვანი გაუმჯობესებით.

მეორე - სექტორულ ჭრილში ყველაზე პოზიტიური ვითარება მშენებლობაში ფიქსირდება. სექტორი ლიდერობს, როგორც მიმდინარე მდგომარეობის, ისე სამომავლო მოლოდინების შეფასებით და წლიურ ჭრილშიც ყველაზე დიდი გაუმჯობესებით გამოირჩევა.

მესამე - მრეწველობაში მომავლის მიმართ მაღალი ოპტიმიზმი მიმდინარე მდგომარეობის შედარებით სუსტ შეფასებას უპირისპირდება. ეს განსხვავება განსაკუთრებით საყურადღებოა, რადგან მომდევნო ექვსი თვის მოლოდინის ეს მაჩვენებელი, ოთხ სექტორს შორის, მეორე ადგილზეა.

მეოთხე - მომსახურებასა და ვაჭრობაში დადებითი ბიზნეს კლიმატი შენარჩუნებულია. თუმცა, წლიური და კვარტალური ცვლილებები აჩვენებს, რომ სექტორების განვითარების განწყობები ერთგვაროვანი არ არის.

საერთო ჯამში, BAG-ის კვლევა საქართველოს ბიზნეს გარემოში პოზიტიურ განწყობებს ასახავს. თუმცა, ამავე დროს აჩვენებს, რომ ბიზნესის ოპტიმიზმი ჯერ კიდევ უფრო მეტად მომავლის მოლოდინებს ემყარება. შესაბამისად, სამომავლოდ, მნიშვნელოვანი იქნება, რამდენად აისახება აღნიშნული მოლოდინები კომპანიების მიმდინარე საქმიანობის გაუმჯობესებაში.

წყარო: საქართველოს ბიზნეს ასოციაცია (BAG), PMC კვლევითი ცენტრი და ifo Institute — BAG Index, 2026 წლის III კვარტალი. კვლევა ჩატარდა 2026 წლის 1–16 სექტემბერს, საქართველოს ბიზნეს ასოციაციის წევრ კომპანიებში.

InternationalInvestment.biz - ქართული რედაქცია