პირველადი ვიზიტები მცირდება განმეორებითი კი იზრდება - როგორია ტენდენცია რიცხვებში?

საქართველოს სტატისტიკის ეროვნული სამსახურის მონაცემებით, 2026 წლის პირველ ცხრა თვეში საქართველოში განხორციელებული ვიზიტების საშუალო თვიური რაოდენობა პრაქტიკულად უცვლელი დარჩა. თუმცა, მნიშვნელოვანი ცვლილება გამოიკვეთა ვიზიტების სტრუქტურაში. კერძოდ, განმეორებითი ვიზიტები გაიზარდა, პირველად ჩამოსული ვიზიტორების რაოდენობა კი შემცირდა. შესაბამისად, 2026 წლის III კვარტალში ვიზიტების ზრდა მთლიანად განმეორებითი ჩამოსვლების მატებით იყო განპირობებული.

2026 წლის III კვარტალი: ვიზიტების ზრდა განმეორებითი ჩამოსვლების ხარჯზე

საქართველოს სტატისტიკის ეროვნული სამსახურის (საქსტატი) მიერ 2026 წლის 30 ოქტომბერს გამოქვეყნებული მონაცემების თანახმად, მიმდინარე წლის III კვარტალში 15 წლის და უფროსი ასაკის საქართველოს არარეზიდენტი ვიზიტორების მიერ განხორციელებული ვიზიტების საშუალო თვიურმა რაოდენობამ 866.1 ათასი შეადგინა. ეს ნიშნავს, რომ 2025 წლის ანალოგიურ პერიოდთან შედარებით მაჩვენებელი 3.3%-ით გაიზარდა, თუმცა, ზრდის საერთო მაჩვენებლის მიღმა საპირისპირო მიმართულებით მოძრავი ორი ტენდენცია იკვეთება.

კერძოდ, პირველად საქართველოში ჩამოსული ვიზიტორების მიერ განხორციელებული ვიზიტების საშუალო თვიური რაოდენობა 224.1 ათასიდან 201.4 ათასამდე შემცირდა, რაც 10.1%-იანი კლებაა. ამის საპირისპიროდ კი, განმეორებითი ვიზიტების რაოდენობა 614.7 ათასიდან 664.7 ათასამდე გაიზარდა და წლიურმა მატებამ 8.1% შეადგინა.

შედეგად, 2026 წლის III კვარტალში ვიზიტების დაახლოებით 76.7% განმეორებით ვიზიტებზე მოდიოდა, ხოლო პირველად საქართველოში ჩამოსული ვიზიტორების წილი მხოლოდ 23.3%-ს შეადგენდა. ერთი წლის წინ ეს თანაფარდობა 73.3% და 26.7% იყო.

ეს ცვლილება მიუთითებს, რომ საქართველოს ტურისტული მიმართულების მიმართ არსებული განმეორებითი მოთხოვნა იზრდება, თუმცა, ახალი ვიზიტორების მოზიდვის მიმართულებით მნიშვნელოვანი ზრდა არ ფიქსირდება.

პირველი ცხრა თვე: საერთო მაჩვენებელი სტაბილურია, თუმცა ვიზიტების სტრუქტურა იცვლება

ამ ტენდენციას კიდევ უფრო ნათლად წარმოაჩენს 2026 წლის იანვარ-სექტემბრის მონაცემები.

უფრო კონკრეტულად, პირველად საქართველოში განხორციელებული ვიზიტების საშუალო თვიური რაოდენობა 133.9 ათასიდან 120.2 ათასამდე შემცირდა, რაც 10.3%-იანი კლებაა. განმეორებითი ვიზიტების მაჩვენებელი კი, 457.9 ათასიდან 472.4 ათასამდე გაიზარდა, ანუ 3.2%-ით.

აღნიშნული ცვლილება ვიზიტების წლიურ სტრუქტურაშიც აისახა. კერძოდ, 2025 წლის იანვარ-სექტემბერში ვიზიტების 22.6% პირველად ჩამოსულ ვიზიტორებზე მოდიოდა, 2026 წლის ანალოგიურ პერიოდში კი ეს წილი 20.3%-მდე შემცირდა. შესაბამისად, განმეორებითი ვიზიტების წილი 77.4%-დან 79.7%-მდე, 2.3 პროცენტული პუნქტით გაიზარდა.

რაც შეეხება კვარტალურ მონაცემებს, მნიშვნელოვანია, რომ პირველად ჩამოსული ვიზიტორების რაოდენობა მეორე კვარტალში 20.7%-ით, ხოლო მესამე კვარტალში 10.1%-ით შემცირდა. ამავე დროს, განმეორებითი ვიზიტები მეორე კვარტალში პრაქტიკულად უცვლელი იყო, მესამე კვარტალში კი 8.1%-ით გაიზარდა.

საერთო ჯამში კი, ეს ნიშნავს, რომ ზაფხულის სეზონზე ვიზიტების საერთო რაოდენობის ზრდა ახალი ბაზრის ათვისებით კი არა, უკვე არსებულ ვიზიტორთა ნაკადის განმეორებითი აქტივობით იყო განპირობებული.

2019 წელთან შედარება: განმეორებითი ვიზიტები აღდგენილია, პირველად ჩამოსულთა მაჩვენებელი კი კვლავ ჩამორჩება

მიმდინარე წლის მონაცემების პანდემიამდელ პერიოდთან შედარება საქართველოს ვიზიტორთა ბაზრის აღდგენის სტრუქტურაზე დამატებით ინფორმაციას იძლევა.

კერძოდ, 2026 წლის III კვარტალში, ვიზიტების საშუალო თვიური რაოდენობა 866.1 ათასი იყო, რაც 2019 წლის ანალოგიური პერიოდის 917.7 ათას მაჩვენებელზე 5.6%-ით ნაკლებია. თუმცა, ტენდენციები განსხვავებულია კატეგორიების მიხედვით. 2026 წლის III კვარტალში განმეორებითი ვიზიტების რაოდენობამ 664.7 ათასი შეადგინა და 2019 წლის მაჩვენებელს - 636.7 ათასს 4.4%-ით გადააჭარბა, ხოლო პირველადი ვიზიტები 201.4 ათასით განისაზღვრა, რაც 2019 წლის 281.1 ათასზე 28.4%-ით ნაკლებია.

მსგავსი სურათი იკვეთება პირველი ცხრა თვის მონაცემების შედარებითაც. პირველად განხორციელებული ვიზიტების რაოდენობა 35.8%-ით ნაკლებია, განმეორებითი ვიზიტების მაჩვენებელი კი თითქმის აღდგენილია და 2019 წლის დონეს მხოლოდ 1.1%-ით ჩამორჩება.

ამრიგად, პანდემიამდელ პერიოდთან შედარებით არსებული სხვაობის ძირითადი ნაწილი პირველად ჩამოსული ვიზიტორების ნაკადის შემცირებაზე მოდის. განმეორებითი ვიზიტების მიმართულებით კი ბაზარი თითქმის აღდგენილია.

წლიური ტენდენციები: პანდემიამდელი ზრდა და პოსტპანდემიური სტრუქტურული ცვლილება

გრძელვადიანი დინამიკა აჩვენებს, რომ საქართველოში არარეზიდენტი ვიზიტორების მიერ განხორციელებული ვიზიტების ზრდა, პანდემიამდე, განსაკუთრებით ახალი ვიზიტორების მოზიდვით იყო განპირობებული.

2015 წელს ვიზიტების საშუალო თვიური რაოდენობა 438.0 ათასს შეადგენდა. 2016 წელს მაჩვენებელი 449.4 ათასამდე, 2017 წელს 540.2 ათასამდე, 2018 წელს 600.3 ათასამდე გაიზარდა, ხოლო 2019 წელს 643.8 ათასს მიაღწია. შესაბამისად, 2015-2019 წლებში ვიზიტების საშუალო თვიური რაოდენობა 47%-ით გაიზარდა.

რაც შეეხება ვიზიტების სტრუქტურას, ამავე პერიოდში პირველად საქართველოში განხორციელებული ვიზიტების რაოდენობა 81.4 ათასიდან 168.9 ათასამდე გაიზარდა, რაც 107.5%-იან მატებას ნიშნავს. განმეორებითი ვიზიტების რაოდენობა კი 356.6 ათასიდან 475.0 ათასამდე გაიზარდა, ანუ 33.2%-ით.

ეს მონაცემები მიუთითებს, რომ პანდემიამდე საქართველოს ვიზიტორთა ბაზრის გაფართოებაში ახალი ვიზიტორების მოზიდვას მნიშვნელოვანი წვლილი შეჰქონდა. მაგალითად, 2015 წელს პირველადი ვიზიტების წილი 18.6% იყო, 2018 წელს კი 27.1%-ს მიაღწია.

განსხვავებულ სურათს აჩვენებს პანდემიის შემდგომი პერიოდის მონაცემები. განსაკუთრებით საყურადღებოა, რომ 2025 წელს საერთო ზრდა განმეორებითი ვიზიტების მატებით იყო განპირობებული. კერძოდ, განმეორებითი ვიზიტების საშუალო თვიური რაოდენობა 2024 წლის 409.1 ათასიდან 448.1 ათასამდე გაიზარდა, რაც 9.5%-იან მატებას ნიშნავს. პირველად განხორციელებული ვიზიტების რაოდენობა კი, ამავე პერიოდში, 128.9 ათასიდან 123.3 ათასამდე შემცირდა (-4.3%).

შესაბამისად, 2025 წელს ვიზიტების საერთო მოცულობის ზრდის მიუხედავად, პირველად ჩამოსული ვიზიტორების მაჩვენებელი კვლავ შემცირების ტენდენციით ხასიათდებოდა.

ამავე ტენდენციას ადასტურებს 2022-2025 წლების შედარებაც. ამ პერიოდში განმეორებითი ვიზიტების საშუალო თვიური რაოდენობა 65.5%-ით გაიზარდა, პირველადი ვიზიტების მაჩვენებელი კი მხოლოდ 1.7%-ით.

ამასთან, პანდემიის შემდეგ ვიზიტების სტრუქტურაში განმეორებითი ჩამოსვლების წილი თანმიმდევრულად იზრდებოდა. კერძოდ, თუ 2022 წელს პირველადი ვიზიტების წილი 30.9% იყო, 2023 წელს 27.2%-მდე, 2024 წელს 24.0%-მდე, ხოლო 2025 წელს 21.6%-მდე შემცირდა.

ეს ცვლილება მიუთითებს, რომ პოსტპანდემიურ პერიოდში საქართველოს ვიზიტორთა ბაზრის რაოდენობრივ აღდგენაში განმეორებითმა ვიზიტებმა უფრო დიდი როლი შეასრულა, ვიდრე ახალი ვიზიტორების მოზიდვამ.

რა მნიშვნელობა აქვს ამ ტენდენციას ტურისტული ბაზრისთვის?

განხილული სტატისტიკური მონაცემები აჩვენებს, რომ საქართველოს ვიზიტორთა ბაზარი რაოდენობრივად იზრდება, თუმცა, ზრდის სტრუქტურა იცვლება. განმეორებითი ვიზიტორების მნიშვნელოვანი წილი შეიძლება მიუთითებდეს საქართველოს, როგორც უკვე ნაცნობი და ხელახლა მოსანახულებელი მიმართულებისადმი არსებულ ინტერესზე. თუმცა, პირველად ჩამოსული ვიზიტორების შემცირება ახალი მომხმარებლების მოზიდვის მიმართულებით არსებულ გამოწვევებს წარმოაჩენს.

ტურიზმის სექტორისთვის ეს გარემოება მნიშვნელოვანია როგორც მარკეტინგული, ისე საინვესტიციო გადაწყვეტილებების თვალსაზრისით. ბაზრის შემდგომი გაფართოებისთვის მხოლოდ არსებული ვიზიტორების დაბრუნებაზე ორიენტირება საკმარისი არ იქნება. მნიშვნელოვანია ახალი სამიზნე ბაზრების ათვისება, ტურისტული შეთავაზებების დივერსიფიკაცია, სეზონურობის შემცირება და ისეთი პროდუქტების განვითარება, რომლებიც საქართველოს პირველად მონახულების მოტივაციას გააჩენს.

საერთო ჯამში, 2026 წლის მონაცემებში იკვეთება მნიშვნელოვანი განსხვავება ვიზიტების საერთო მოცულობასა და მისი ზრდის წყაროს შორის: საქართველო ინარჩუნებს და ზრდის განმეორებითი ვიზიტორების ნაკადს, თუმცა, ახალი ვიზიტორების მოზიდვა კვლავ მნიშვნელოვან გამოწვევად რჩება.