ინვესტიცია, ახალი ტერმინალი და მგზავრთნაკადის ზრდა - ბათუმის საერთაშორისო აეროპორტი გაფართოებას გეგმავს

ბათუმის საერთაშორისო აეროპორტი ინფრასტრუქტურული განვითარების ახალ ეტაპზე გადადის. მგზავრთნაკადის ზრდის, ახალი ავიაკომპანიებისა და საჰაერო მიმართულებების დამატების ფონზე, აეროპორტის ოპერატორი კომპანია TAV Georgia მომსახურების შესაძლებლობების გაფართოებას გეგმავს.

2026 წლის განმავლობაში წარმოდგენილი გეგმები ორ ძირითად მიმართულებას მოიცავს: მოკლევადიან პერიოდში არსებული ტერმინალის მოდერნიზაციასა და გამტარუნარიანობის გაზრდას, ხოლო გრძელვადიან პერსპექტივაში - აეროპორტის მასშტაბურ გაფართოებას, მათ შორის ახალი ტერმინალის მშენებლობას.

მგზავრთნაკადი იზრდება, ინფრასტრუქტურა კი დამატებით შესაძლებლობებს საჭიროებს

ბათუმის საერთაშორისო აეროპორტმა 2025 წელი რეკორდული მაჩვენებლით დაასრულა. პირველად ისტორიაში, წლიურმა მგზავრთნაკადმა 1 230 200 მგზავრს მიაღწია, რაც 2024 წლის მაჩვენებელს 29%-ით აღემატება.

ზრდის ტენდენცია გაგრძელდა 2026 წელსაც. კერძოდ, TAV Georgia-ს მიერ გავრცელებული მონაცემებით, 2026 წლის იანვარ-სექტემბერში, ბათუმის საერთაშორისო აეროპორტი 1 098 027 მგზავრს მოემსახურა. შედეგად, მგზავრთნაკადი წლიურად 10%-ით გაიზარდა.

განსაკუთრებით მაღალი აქტივობა, როგორც მოსალოდნელი იყო, ზაფხულის სეზონზე დაფიქსირდა. ივნისიდან სექტემბრის ჩათვლით მგზავრთნაკადის ზრდამ 27% შეადგინა. 13 აგვისტოს კი აეროპორტმა ერთ დღეში 11 005 მგზავრი მიიღო და დღიური რეკორდი დაამყარა.

ამ ტენდენციის ჩამოყალიბებაში მნიშვნელოვანი როლი შეასრულა საჰაერო კავშირების გაფართოებამაც. 2026 წელს ბათუმის აეროპორტს 11 ახალი მიმართულება და 8 ახალი ავიაკომპანია დაემატა. ოქტომბერში გავრცელებული მონაცემებით კი, აეროპორტიდან 40 მიმართულებით ფრენებს, 30 ავიაკომპანია ასრულებდა.

ეს მაჩვენებლები მიუთითებს, რომ ბათუმის აეროპორტისთვის ინფრასტრუქტურის გაფართოება მხოლოდ სამომავლო განვითარების საკითხი აღარ არის - ის უკვე არსებული მოთხოვნის დაკმაყოფილებითაც არის განპირობებული.

TAV Georgia ბათუმის აეროპორტში 5 მილიონი დოლარის ინვესტიციას გეგმავს

აეროპორტის განვითარების მოკლევადიანი გეგმის ფარგლებში TAV Georgia დაახლოებით 5 მილიონი აშშ დოლარის ინვესტიციას განახორციელებს.

კომპანიის გენერალური მენეჯერის, თეა ზაქარაძის მიერ 2026 წლის ივნისში გავრცელებული ინფორმაციის თანახმად, პროექტის მიზანია არსებული ტერმინალის გაფართოება და მგზავრთა მომსახურების პროცედურების გაუმჯობესება. უფრო კონკრეტულად, პროექტი ითვალისწინებს დაახლოებით 1 000 კვადრატული მეტრის დამატებითი ფართობის მოწყობას. ანუ, ამჟამად არსებული ტერმინალის ფართობი დაახლოებით 8 000 კვადრატულ მეტრს შეადგენს და ის 9 000 კვადრატულ მეტრამდე გაიზრდება.

გარდა ამისა, დაგეგმილია:

• რეგისტრაციის დახლების რაოდენობის 14-დან 18-მდე გაზრდა;

• საპასპორტო კონტროლის ზონაში ჯიხურების რაოდენობის ხუთამდე გაზრდა;

• საოპერაციო და ადმინისტრაციული სივრცეების გაფართოება;

• თანამშრომლებისთვის დაახლოებით 450 კვადრატული მეტრის საოფისე ფართის მოწყობა;

• მგზავრთა გადაადგილებისა და მომსახურების პროცესების ოპტიმიზაცია.

TAV Georgia-ს ინფორმაციით, განხორციელებული სამუშაოების შედეგად აეროპორტის წლიური გამტარუნარიანობა დაახლოებით 1.3 მილიონიდან 1.7 მილიონ მგზავრამდე გაიზრდება. ეს კი დაახლოებით 25%-იან ზრდას, ანუ, წელიწადში დამატებით 400 000 მგზავრის მომსახურების შესაძლებლობას გულისხმობს.

კომპანიის გეგმის მიხედვით, 2027 წელს, ბათუმის აეროპორტი, განახლებული ინფრასტრუქტურით უნდა შეხვდეს.

განიხილება ახალი ტერმინალის მშენებლობაც

ბათუმის აეროპორტის განვითარების უფრო მასშტაბური ხედვა, 2026 წლის 19 თებერვალს, საქართველოს ეკონომიკისა და მდგრადი განვითარების სამინისტროში გამართულ სამუშაო შეხვედრაზე განიხილეს. უფრო კონკრეტულად, TAV Georgia-ს წარმომადგენლებმა მინისტრ მარიამ ქვრივიშვილს აეროპორტის გაფართოების კონცეპტუალური ხედვა წარუდგინეს.

გეგმა ითვალისწინებს, როგორც არსებული ტერმინალის გაფართოებას, ისე ახალი ტერმინალის მშენებლობას. პროექტი, ასევე, მოიცავს აეროპორტის სხვა მნიშვნელოვანი ინფრასტრუქტურის განვითარებასაც.

სამუშაო შეხვედრაში ეკონომიკის სამინისტროს, სამოქალაქო ავიაციის სააგენტოს, საქართველოს აეროპორტების გაერთიანებისა და საქაერონავიგაციის წარმომადგენლებიც მონაწილეობდნენ. დასასრულს კი, მხარეები შეთანხმდნენ, რომ აეროპორტის გაფართოების პროექტზე მუშაობა გაგრძელდებოდა.

ამ ეტაპზე ახალი ტერმინალის მშენებლობის საბოლოო საინვესტიციო მოცულობა, ტექნიკური პარამეტრები და განხორციელების კონკრეტული ვადები საჯაროდ გაცხადებული არ არის. შესაბამისად, ეს ინიციატივა უნდა განვიხილოთ როგორც განვითარების კონცეპტუალური მიმართულება და არა უკვე დაწყებული სამშენებლო პროექტი.

აეროპორტის გამტარუნარიანობა და აჭარის ტურისტული პოტენციალი

ბათუმის საერთაშორისო აეროპორტის გაფართოების საჭიროება რეგიონში ტურიზმის ზრდასაც უკავშირდება.

2026 წლის 25 ივნისს ეკონომიკისა და მდგრადი განვითარების სამინისტროსა და აჭარის მთავრობის წარმომადგენლებმა აეროპორტში ზაფხულის ტურისტული სეზონისთვის განხორციელებული სამუშაოები დაათვალიერეს. სამინისტროს ინფორმაციით, არსებული ტერმინალის დაახლოებით 8 000 კვადრატულ მეტრ ფართობს დამატებით 1 000 კვადრატული მეტრი ემატება. სხვადასხვა მიმართულებით განხორციელებული და მიმდინარე სამუშაოების შედეგად კი, აეროპორტის საერთო გამტარუნარიანობა 22–25%-ით გაიზრდება.

ამასთან, ხელისუფლების წარმომადგენლებმა აეროპორტის განვითარების კონტექსტში აჭარაში დაგეგმილი Eagle Hills-ის პროექტის მნიშვნელობაზეც ისაუბრეს. სამინისტროს შეფასებით, აღნიშნული პროექტი რეგიონში ახალ მიზიდულობის ცენტრს შექმნის და ხელს შეუწყობს აჭარის ოთხსეზონიან ტურისტულ მიმართულებად ჩამოყალიბებას. ეს გარემოება კი, თავის მხრივ, შესაძლოა აისახოს საერთაშორისო ავიარეისების რაოდენობისა და მგზავრთნაკადის შემდგომ ზრდაზე.

თუმცა, გრძელვადიანი მოთხოვნის შეფასებისას მნიშვნელოვანია არამხოლოდ ახალი სასტუმროებისა და ტურისტული ობიექტების რიცხვის ზრდა, არამედ მათი რეალური დატვირთვა, სეზონურობის შემცირება და საერთაშორისო ვიზიტორების მოზიდვის შესაძლებლობებიც.

რა შეიძლება შეცვალოს აეროპორტის გაფართოებამ საინვესტიციო გარემოში?

ბათუმის საერთაშორისო აეროპორტის გამტარუნარიანობის ზრდას რეგიონის ეკონომიკისთვის რამდენიმე მიმართულებით შეიძლება ჰქონდეს მნიშვნელობა. კერძოდ:

ტურიზმი და სასტუმრო ბიზნესი - დამატებითი ავიარეისები და მგზავრთა მომსახურების გაზრდილი შესაძლებლობები საერთაშორისო ვიზიტორებისთვის ბათუმის ხელმისაწვდომობას გააუმჯობესებს. ეს განსაკუთრებით მნიშვნელოვანია სასტუმროებისა და ტურისტული მომსახურების სექტორისთვის.

უძრავი ქონება - საერთაშორისო სატრანსპორტო კავშირების გაუმჯობესება ერთ-ერთი ფაქტორია, რომელიც რეგიონში საინვესტიციო პროექტების მიმზიდველობაზე მოქმედებს. თუმცა, უძრავი ქონების ბაზარზე მოთხოვნის ზრდა მხოლოდ აეროპორტის გაფართოებით არ განისაზღვრება - მნიშვნელოვანია ფასები, მიწოდების მოცულობა, ტურისტული დატვირთვა და პროექტების ეკონომიკური მდგრადობა.

ბიზნესკავშირები - ახალი საჰაერო მიმართულებები ზრდის ბათუმის ხელმისაწვდომობას უცხოელი ინვესტორებისთვის, ბიზნესვიზიტორებისა და საერთაშორისო პარტნიორებისთვის.

დასაქმება და მომსახურების სექტორი - აეროპორტის გაფართოება და მგზავრთნაკადის ზრდა დამატებით მოთხოვნას ქმნის ტრანსპორტზე, კვების ობიექტებზე, საცალო ვაჭრობასა და სხვა მომსახურებებზე.

ამასთან, ინფრასტრუქტურის გაფართოების ეფექტიანობა დამოკიდებული იქნება იმაზე, რამდენად თანმიმდევრულად განვითარდება აეროპორტი, რეგიონული სატრანსპორტო ქსელი და ტურისტული მომსახურების სექტორი.

ბათუმის აეროპორტის განვითარების შემდგომი ეტაპი

2026 წლის მდგომარეობით, ბათუმის საერთაშორისო აეროპორტის განვითარების პროცესი ორ ურთიერთდაკავშირებულ ამოცანას ემსახურება: არსებული მგზავრთნაკადის ზრდის შესაბამისი მომსახურების უზრუნველყოფასა და გრძელვადიან პერსპექტივაში აეროპორტის ინფრასტრუქტურული შესაძლებლობების გაფართოებას.

5 მილიონ დოლარიანი საინვესტიციო პროექტი და წლიური გამტარუნარიანობის 1.7 მილიონ მგზავრამდე გაზრდის გეგმა მოკლევადიანი განვითარების მნიშვნელოვანი ნაწილია. ამასთან, ახალი ტერმინალის მშენებლობის კონცეპტუალური ხედვა აჩვენებს, რომ აეროპორტის გაფართოება შესაძლოა უფრო მასშტაბურ საინვესტიციო პროცესადაც იქცეს.

ბათუმის საერთაშორისო აეროპორტის შემდგომი განვითარება მნიშვნელოვანი იქნება არა მხოლოდ ავიაციის სექტორისთვის, არამედ მთლიანად აჭარის ტურისტული და საინვესტიციო გარემოსთვის. საბოლოო შედეგს კი, განსაზღვრავს დაგეგმილი ინვესტიციების განხორციელების ვადები, ახალი ავიამიმართულებების მდგრადობა და რეგიონში ტურისტულ მოთხოვნაზე ინფრასტრუქტურის განვითარების რეალური გავლენა.